Hebun Okçu'nun Diyarbakır sergimizle ilgili Kürtçe (Zazakî) haberi

Salı, 12 Temmuz, 2016

DÎYARBEKIR DE PÊŞANGEYÊ FOTOGRAFAN

Xebere: Hebûn Okçu

Dîyarbekir de 11 hezîran 2016 de Parka Sumerî de, Galerîya Hunerî ya Amedî de pêşangeyê fotografan abi. Pêşange bi nameyê “Zere ra bi teber, teber ra bi zere: Pirdê Fotografan” (İçeriden dışarı, dışarıdan içeri: Fotoğraf Köprüsü) dest pêkerd û heta 25 hezîrane go dewam bikero.

Pêşange hetê Grûba Fotografan ya Red’î û bi Ekîbê Görülmüştür ra organîze beno. Projeyê înan gulana 2015î de dest pêkerdo. Ekîbê Görülmüştür ke wazenê têkilîya hepsîyanê şorişgeran û teberî virazê, 55 fotografê Grûba Fotografan ya Red’î hepsîyan rê şirawitê, hepsîyan zî nê fotografî şîrove kerdê û apey seba grûbe şirawitê.

Serokê Şaredarîya Pîle ya Dîyarbekirî Firat Anlı zî hamebi akerdişê pêşangeyê “Zere ra bi teber, teber ra bi zere: Pirdê Fotografan”.

"Şarê ma gerek bêro no pêşangeyî û nê fotografanê muhîman bivîno."

Akerdişê pêşange de Serokê Şaredarîya Pîle ya Dîyarbekirî Firat Anlı va: “No welato ke ma tede ciwîyenê, mileto ke tede yo, no milet reye esta nêeşkeno xo îfade bikero û reya esta zî nêeşkeno cuya xo azad dewam bikero. Teber de hal wina bo, la zere de senî beno? Merdim mîyanê çar dêsan de zî bo, hêvîya xo bi cewherê hetê çepê sîneyê xo ra, yanî zerrîya xo ra gêno. Bawerîya xo bi cuya xo, bi ciwîyayîşê xo û bi hêvîya xo ano.

Na dewlete de, se serrê peyênî de, fikiryayîş, bawerî, fikrê sîyasî yan fikrê muxalifî ra derheqê gelêk kesan de qerarê tewqîfkerdişî, qerarê surgunîye vecîya. Bi se hezaran kesî mahkûm bîy. Ma eger qalê Hepisxaneyê Saraykapı bikerin, ê hepsîyê ke uca mendêne, mîyanê înan de semedê hunerê ma gelêk merdimê muhîmî estê. No hal Hepisxaneyê Metrisî de, Hepisxaneyê Mamakî de zî wina yo. Ma nêeşkenê vacin no hal, na rewşe vurîyaya. Hema hema heyatê ma hemîne yan heyatê pêro merdiman yan mîyanê dêsanê hepisxaneyan de yan zî peyê dêsanê hepisxaneyan de derbas beno”

“Ma wazenê mîyanê şarî û hepsîyan de têkilî virazîyo.”

Koordînatorê Ekîbê Görülmüştür Adil Okay semedê nê pêşangeyî wina malumat da: “Ekîbê Görülmüştür bî panc serrî hepsîyan dir têkîlîye de yo. Ma gelêk kampanyayê sey hepsîyan rê şirawiştişê mektuban organîze kerdî. No pêşange zî nê kampanyanan ra yew o. Ma wazenê mîyanê şarî û hepsîyan de yew têkilî virazîyo. Bi no fikir ma di tewirê hunerî ardî yew ca, kerdî yew. Hunerî edebîyatî û hunerî fotografî.”

“55 Fotografî, 30 Hepisxaneyî, 55 Hepsî û 55 şîîrî…”

“Beşê fotografan de zî ma bi Grûba Fotografan ya Red’î dir şuxulîyayî. Na grûbe ra 55 kesan 55 fotografê xo ma rê şirawitî. Ma zî nê fotografî 30 hepisxaneyan rê şirawitî. Nê hepisxaneyan de 55 hepsîyan ma rê semedê nê fotografan şîîrê zaf weşî nuştî. Ma bawer nêkerdêne ke hendêk weş bibîyêne. Çimkî heta fotoğrafî şîyêne hepisxane û heta hemayêne prosesêko zaf zehmet bi. Pêşangeyê fotografan yê ‘Zere ra bi teber, teber ra bi zere: Pirê Fotografan’ Diyarbekir ra ver, ma Mersîn, Adena, Batman, Ruha û Îstanbul de akerdbi. Badê tîyayî ma go şêrin Îzmîr, Anqara û Ewropa. Ma şêrin ça, ma wazenê derheqê hepsîyan de yew hissîyat virazîyo. Eleqeyo ke nîşanê pêşangeyî beno ra ma memnun ê.  Hîna zaf aîle û merdimê hepsîyan yenê. Yenê û nê fotografan vînenê, ê zî zaf keyfweş benê. Ez hevîdar a ke pêşange bi no eleqe dewam bikero.”

“55 Hepsî, 55 Nameyî…”

Pêşange de 55 fotografî estê. Nê fotografê fotografantoxanê namdaran verê cû hepsîyan rê ameyê şawitiş. Her hepsîyêk yew fotograf şîrove kerdo yan zî ser o yew şîîre nuşta.  Nameyê nê 55 fotografantoxan wina yo: Adem Topal, Adil Okay, Ali Osman Abalı, Arzu Aybat Yaşar, Atilla Atala, Aysel Akbaba, Baki Gülhan, Bekir Tuğcu, Birgül Şahin, Burcu Çatıker, Canan Mengün, Cansel Özoğul, Çağdaş Erdoğan, Damla Atak, Emine Başa, Engin Çolakoğlu, Enver Enli, Ercan Yiğit, Eyhan Çelik, Ezgi Özyetkin, Güner Kaya, Hakan Tosun, Halil Doğan, Hayri Tunç, İsmail Gökçe, Metin Ekinci, Murat Kıcır, Murat Yazar, Özcan Yaman, Pembegül Gökçek, Pınar Turan, Sakine Yıldıran, Seda Öz, Selah Özakın, Selda Öztürk, Sema Barbaros, Serkan Çolak, Sevra Nihal Ünal, Sinan Kılıç, Sinem Sayar, Sultan Güner, Tahir Bozkurt, Tolga Sezgin, Ulaş Tosun, Ümran Düşünsel, Yasemin Arslantaş, Yasemin Karaca, Yasin Irmak, Yeşim Ağaoğlu, Yeşim Oğuz, Yusuf Aslan, Yusuf Özdemir, Yücel Tunca, Yüksel Uygun, Zeynep Türközü.

Nameyê 55 hepsîyan zî wina yo: A. Kerim Aktaş, A.Rahim Yıldız, Adnan Öztel, Ahmet Bilge, Ali Osman Köse, Ayhan Kavak, Aynur Epli, Bejdar Ro Amed, Burak Yiğit, Deniz Tepeli, Ebedin Abi, Edip Yalçınkaya, Ercan Binay, Erdal Aslan, Ergül Çiçekler, Erol Engin, Erol Zavar, Eylem Baş, Fadime Özkan, Ferda İldan, Ferman Mordeniz, Fikret Karakoç, Gönül Bulut, Gülazer Akın, Hacı Nehsan, Hasan Gülbahar, Hasan Şahingöz, Haydar Sönmez, Hıdır Yıldız, İbrahim Şahin, Kamil Turanlioğlu, Kenan Karaaslan, M. Nuri Özen, Mahmut Ulusan, Mehmet Boğatekin, Metin Yamalak, Muhabbet Kurt, Musa Şanak, Mustafa Ağcakaya, Nurettin Erenler, Özlem Özdemir, Resmiye Vatansever, Resul Kocatürk, Rıdvan Yusufoğlu, Ruşen Özkan, Sedat Ot, Seyit Oktay, Sinan Bülbül, Şehnaz Şahin, Şemsettin Özer, Veli Özdemir, Yusuf Demir, Zeki Kayar, Zeliha Bulut, Zeynep Avcı.

Mîyanê nê 55 hepsîyan ta tena Musa Şanakî mîyanê şîîra xo de çend rêzî bi kurdkî (kurmanckî) nuştê. 54 hepsîyanê bînan nuşte û şîîrê xo bi tirkî nuştê. Musa Şanak nika 2 No’lu F Tipi Ceza İnfaz Kurumu, Sincan/Anqara de maneno.

Şîîrê ey wina ya:

“Kapı açılıyor

Konuk oluyoruz biz onun o büyük kalbine

Ama gelip yapışıyor bize

Yoksulluğun o koyu

O bulaşıcı kokusu

Gelip işgal ediyor sokakları

Kenbaz dikene

Ronî dike

Tarîya têger

A xizan

A li pişt derîyê nîv vekîrî

Kenbaz gülümsüyor

Aydınlanıyor

O yoksul o bulaşıcı karanlık

O yarı açık kapının ardındaki”

Seba melumatî zêdeyî û derheqê heme hepsîyan de merdim eşkeno keyepelê www.gorulmustur.org ziyaret bikero.

Grûba Fotografan ya Red’î

Bi gorê fekê înan, ê xo bi no qayde danê şinasnayîş:

Grûba Fotografan ya Red’î seranser bi reya pratîk ser o eşkenê bêrê pêser û projeyanê kolektîfan, projeyanê somutan virazê. Na grûbe de hunermend, muxabîrê fotografan û fotografantoxî estê. Nê merdimî makîneyanê xo yê fotografantişî yê profesyonelan yan zi amatoran reyde resenê amancê xo. No resayîşê amancî de qaydeyê fotografî û estetîk muhîm o. Na çarçewa de kam wazeno eşkeno bêro mîyanê ma û bibo fotografantoxê Red’î.

Grûba Fotografan ya Red’î, badê pêşangeyê ma “Îstanbulî Îşgalî, gulane 2008 (İşgal İstanbul’u, Mayıs 2008)” hezîrana 2008î de bi 27 fotografantoxan saz bîye û ma Grûba Fotografan ya Red’î ronaye.

Hetê çapemenîye û şarî ra zaf eleqe dî. Kam wazeno derheqê ma de melumatî zêdeyî bimuso eşkeno keyepelê ma www.redfotograf.com ziyaret bikero.

Kaynak: BasNûçe gazetesin, sayı: 108, s.13.